Os podólogos recomendan revisar atentamente os pés no verán para evitar rozaduras, bochas, sudación, sequidade e a aparición de fungos.
O pé de atleta e as verrugas son as infeccións máis frecuentes causadas polo contaxio en piscinas e duchas públicas.
O Colexio de Podólogos de Galicia advirte de que a tempada estival trae consigo unha serie de complicacións para os pés. Se non se lles presta a atención que se merecen, pódense sufrir rozaduras, bochas, exceso de sudación ou sequidade e diversos tipos de infeccións.
As altas temperaturas favorecen que se use un calzado aberto, sen calcetíns nin medias, que habitualmente provocan no pé pequenas feridas causadas polo rozamento da pel ou bochas que xeran un líquido baixo a epiderme. Para tratar unha rozadura, os podólogos aconsellan desinfectala e cubrila cun apósito mentres que a bocha debe deixarse curar ata que a pel despréndase por si mesma.
A sudación pode provocar gretas interdixitais, aínda que pode controlarse con produtos antitranspirantes. Para iso, os podólogos galegos indican que é preciso aplicar un antiséptico que facilite o seu cicatrización e secar moi ben a pel entre os dedos despois da ducha, e aplicar pos de talco antes de calzarnos.
A patoloxía contraria sería a sequidade excesiva da pel. Maniféstase especialmente en forma de capa esbrancuxada sobre os talóns xerando durezas e asperezas. Pódese evitar aplicando con frecuencia crema hidratante, pero se o problema persiste ou empeora dando lugar a picor, descamacións ou mal cheiro hai que acudir a un podólogo.
Outro dos problemas habituais que chegan co verán son os fungos. Estas infeccións cutáneas tenden a aparecer coa sudación extrema e a humidade. O máis típico de todos é o que se denomina pé de atleta, que aparece nos dedos e provoca proído, unha pel arroibada, seca e escamada. Aínda que se trata con medicación específica, para previlo os especialistas aconsellan utilizar un calzado transpirable, calcetíns de fío ou algodón, non compartir toallas e secar coidadosamente os dedos dos pés. Ademais, tamén é moi frecuente o contaxio de papilomas, un virus que orixina verrugas plantares, xerados en lugares húmidos e quentes como piscinas, ximnasios ou saunas. Tanto para o pé de atleta como para o papiloma é moi recomendable usar chancletas ou zapatillas de goma en lugares públicos.
Con todo, os profesionais recomendan as visitas regulares ao podólogo para evitar este tipo de doenzas nos pés.
[FONTE: http://copoga.com/ ]